कपिलवस्तु ३ असोज
नेपाल प्रहरीको संरक्षणमा कपिलवस्तुको सीमा क्षेत्रहरुमा तस्करी मौलाएको छ । भारतीय वस्तुहरुमा अनिवार्य गरिएको आयकर जिएसटी र सोहि पत्रका आधारमा नेपालमा हुने वस्तु भन्सारका कारण सीमा क्षेत्रमा तस्करी बढेपनि प्रहरीले त्यसलाई नियन्त्रण गर्न चासो देखाएको छैन । तेश्रो मुलुकबाट नेपाल भित्रने सामानहरु अहिले धमाधम भारत तर्फ तस्करी भई रहेको छ । विगत २ साताको अवधिमा भारतीय सीमा सुरक्षा बल ९एसएसबी०ले नेपालबाट भारत लैजादै गर्दा लाखौ मुल्य पर्ने सामान पक्राउले यसको पुष्टि गरेको छ । तेश्रो मुलुकबाट नेपाल ल्याउने र त्यहा बाट तस्करी गरि भारत लैजाने वस्तुमा अहिले सबै भन्दा बढि थाइल्याण्ड, मलेशिया तथा इन्डोनेशियाबाट आयातित मटरको दाल, कालो मरिच, सुपारी, ल्वाङ्ग, छुवारा, सानो अलैची रहेका छन् । यसै गरि चीन बाट आउने इलेक्ट्रोनिक्स, मेमोरी कार्ड र स्याउ पनि भारत तर्फ तस्करी भइरहेको छ ।
भारतीय बजारमा प्रतिबन्ध र महंगो पर्ने भएपछि अहिले नेपाली चुरोट र गुट्खाहरु समेत अवैध बाटो तस्करले भारती बजारमा लगिरहेका छन् । गत साता मात्रै भारतीय सीमा सुरक्षा बलले कपिलवस्तुबाट गएको ३३ क्वीन्टल मटर दाल सीमाना पारी ककरहवामा पिकअप भ्यान सहित पक्राउ गरेको थियो । यसै गरि पिपरा को पिलर नम्बर ३३ नजिकै भारतीय एसएसबीले ३ क्वीन्टर मटर दाल र ३ साइकल बरामद गरेको भारतीय पत्रिका अमर उजालाले समाचार प्रकाशन गरेको छ । भारतीय एसएसबी उपनिरिक्षक बरुण कुमारले केहि दिन यता नेपालबाट भारत तर्फ दाल, सुपारी, मरिच लगायतका वस्तुको अवैध आयात भइरहेको स्वीकार गरेका छन् । विहिबार राती पुनः भारतीय सीमा सुरक्षा बलले ६ क्वीन्टल मटरको दाल र ७५ किलो छुवारा पक्राउ गरेको छ । एसएसबीका अनुसार उक्त सामान चाकरचौडाका व्यापारी अमित गुप्ता र शोहरतगढका व्यापारी संजयको रहेको पक्राउ परेका ओसारपसारकर्ता हरुले जानकारी दिएका छन् ।
अहिले जिल्लाको ठकुरापुर, सिर्सिहवा, कृष्णनगर, कुकुरभुकवा, भिल्मी, हरदौना, मर्यादपुर, रंगपुर, बेलवा तुल्सिपुर, चाकरचौडा, हथिहवा दोहनी लगायतका नाकाहरुबाट निर्वाध रुपमा तस्करी भइरहेको छ । सबै भन्दा बढि चाकरचौडा नाकाबाट तस्करी भइरहेको स्थानीयबासीहरुको भनाई छ । भन्सार कर्मचारीहरु समेत प्रहरी संग मिलेर तस्करको साथ दिएपछि स्थानीयले राजस्व अनुसन्धान विभागलाई उजुरी गरेका थिए । विभागले भदौ १६ गते छापा हान्दा भारतबाट तस्करी गरि ल्याइएको ७३ लाख बराबरको सामान बरामद भएको थियो । जसमा ६० लाखको सुर्ती मात्र थियो । राजस्व अनुसन्धान बुटवलका प्रमुख विजय रानाका अनुसार स्थानीय जगन्नाथ उपाध्यायको घरबाट उक्त सामान बरामद भएको थियो । उक्त सामान सकिल खाँनको रहेको प्रहरी श्रोतले जनाएको छ ।
चाकरचौडा नाका अहिले सबै तस्करको केन्द्र बनेको छ । चाडबाडका लागि आवश्यक पर्ने कपडा, चिनी र खसिबोका समेत त्यहाबाट नेपाल ल्याइन्छ भने तेश्रो मुलुकका सामान भारत पठाइन्छ । चाकरचौडा प्रहरी नायब निरिक्षक घडिराम यादवले मासिक लाइन लिएर तस्करी चलाएपछि अहिले सो क्षेत्र अवैध ओसार पसारको केन्द्र बनेको स्थानीयबासीहरु बताउछन् । सुरक्षा श्रोतका अनुसार मर्चवार घर भएका यादव बर्तमान एसपी दीपशमशेर जबराका विश्वासिला पात्र हुन् । पटक पटक विवादमा आउदा समेत उनलाई जहाँको त्यहि राखिएपछि सो क्षेत्रमा तस्करी झन मौलाएको श्रोतको दाबी छ । श्रोतका अनुसार उनले तस्कर सकिल खाँन सित मासिक २० हजार लिने गरेका छन् । यसै गरि व्यापारी सुवास जैसवाल संग १० हजार , फकरुदिन संग ५ हजार , चन्द्र प्रकाश संग २ हजार लाला भन्ने व्यापारी संग ८ हजार लिदै आएका छन् । त्यस्तै भारतबाट नेपाल सामान ल्याउने पप्पू कलवार संग ३ हजार , गोलू संग ३ हजार , हरिहर संग ५ हजार , अरमान संग २ हजार गरी करीब २ दर्जन भन्दा बढी ब्यापारी संग महिनाबारी लिदै आएको श्रोतको दाबी छ । उनले सबै तस्करहरुलाई आफ्नो घुमुवा प्रहरी जवान घनश्याम यादव मार्फत रकम संकलन गर्न लगाउने गरेका छन् । सीमा प्रहरी चौकी चाकरचौडाका प्रमुख यादवले भने आफुलाई बदनाम गराउनका लागि अनावश्यक हल्ला फैलाइएको दाबी गर्नुभयो । प्रहरी प्रवक्ता डिएसपी सुनिल मल्लले पनि सीमा क्षेत्रमा बढ्दो तस्करी नियन्त्रणका लागि विशेष टोली परिचालन गर्ने तयारी भइरहेको बताउनुभयो । चाकरचौडाको बारे आवश्यक अनुसन्धान गर्ने मल्लले जानकारी दिनुभयो ।
तत्कालिन प्रहरी उपरिक्षक मनोज यादव तथा प्रहरी नायब उपरिक्षक रबी रावल कार्यरत रहदा सोहि समयमा ७० लाख बढिका सामान भन्सार चलान गरिएको थियो । तर अहिले नेपाली समान भारतीय सुरक्षा बलले पक्राउ गर्दा सीमाका सुरक्षाकर्मीको क्षमतामा प्रश्न खडा भएको छ । श्रोतका अनुसार तस्करी बढ्नुमा जिल्ला प्रहरी कार्यालयको नेतृत्वको दबाव पनि मुख्य कारण हो । प्रत्येक सीमा प्रहरी चौकी तथा ईलाका प्रहरी कार्यालयबाट महिनाबारी आउने तोकुवा रकम विगत भन्दा दोब्बर बढेपछि तस्करी खुकुलो भएको र चौकी इन्चार्जहरु श्रोत जुटाउने धन्दामा लागेको जिल्लाको सुरक्षा श्रोतको दाबी छ । यो समाचार आजको बुद्ध दर्पण दैनिकमा प्रकाशित छ ।
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया