काठमाडौँ, २५ साउन: वाग्मती प्रदेशका क्रियाशील पत्रकारका लागि यही साउन २२ गतेदेखि सुरु गरिएको आचारसंहितासम्बन्धी तीनदिने तालिम आइतबार सम्पन्न भएको छ । तुलसादेवी हरिहर फाउन्डेसनले आयोजना गरेको सो तालिममा काठमाडौँ उपत्यकासहित वाग्मती प्रदेशका सबै जिल्लाका २४ क्रियाशील पत्रकारको सहभागिता थियो ।
तालिममा वरिष्ठ पत्रकार प्राध्यापक रामाकृष्ण रेग्मी, नेपाल पत्रकार महासङ्घका पूर्वअध्यक्षद्वय डा सुरेश आचार्य र धर्मेन्द्र झा, विज्ञापन बोर्डका अध्यक्ष लक्ष्मण हुमागाईं, राष्ट्रिय समाचार समितिका प्रधानसम्पादक एकराज पाठक, प्रेस काउन्सिल नेपालका प्रमुख प्रशासकीय अधिकृत झविन्द्र भुसाल, वरिष्ठ प्रशासकीय अधिकृत दीपक खनाल र पत्रकार डिल्लीरमण सुवेदीले प्रशिक्षण दिएका थिए ।
प्रशिक्षकले पत्रकार आचारसंहिता विश्व परिवेश र नेपाल सन्दर्भ, आचारसंहिता नियमनमा प्रेस काउन्सिलको भूमिका, छापा सञ्चारमाध्यम, रेडियो, टेलिभिजन तथा अनलाइन मिडियामा आचारसंहिताको पालनासम्बन्धी विषयमा प्रशिक्षण दिएका थिए । विभिन्न सञ्चारमाध्यममा कार्यरत क्रियाशील सहभागी पत्रकारले सो तालिम उपलब्धिमूलक भएको बताएका थिए ।
तालिममा सहभागीलाई प्रमाणपत्र वितरण गर्दै वरिष्ठ पत्रकार प्राध्यापक रेग्मीले अहिलेको इन्टरनेटको युगमा आचारसंहिताको बहस कठिन विषय भएको बताए । उनले कागजको पानामा मात्र सीमित नभएर मोबाइलको स्क्रिनमा सूचना प्रवाह भइरहेको यो आधुनिक युगमा पत्रकारले मात्र नभएर सञ्चारकर्मीले पनि आचारसंहिता पालना गर्नुपर्छ भने । अहिले सन्देश दिने र लिने को हुन् भनेर छुट्याउनै कठिन अवस्था आएको भन्दै उनले त्यसैले पनि पत्रकारको आचारसहिंता अहिले झन बढी सान्दर्भिक भएको धारणा राखे ।
तालिम कार्यक्रमको समापनमा फाउन्डेसनका अध्यक्ष सरु सुवेदीले प्रशिक्षक, प्रशिक्षार्थी र सहयोगी संस्थालाई धन्यवाद दिँदै यस कार्यक्रमबाट आफूले पनि पत्रकारिताको आचारसंहिताको कति धेरै महत्व रहेछ भन्ने कुरा बुझ्ने अवसर पाएको बताए ।
यसअघि सो संस्थाले प्रदेश नं १ का पत्रकारलाई विराटनगरमा र २ को जनकपुरमा यही तालिम सम्पन्न गरिसकेको छ । त्यसैगरी गण्डकी प्रदेश र सुदूरपश्चिम प्रदेशका पत्रकारका लागि भने भर्चुअल विधिबाट तालिम सम्पन्न भएको सो फाउन्डेशनले जनाएको छ ।
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया