जनजागृति मावि लाेहराैलामा ४ कोठे दुई तल्ले भवन शिलान्यास

घनश्याम भर

(विजयनगर) कपिलवस्तु, २९ जेष्ठ ।

कपिलवस्तुको विजयनगर गाउँपालिका-२ लोहरौलामा अवस्थित जनजागृति माध्यमिक विद्यालयमा ४ कोठे दुई तल्ले नयाँ विद्यालय भवनको शिलान्यास गरिएको छ । पुर्व सांसद सराज अहमद फारुकीकाे पहलमा भवन निर्माण हुन लागेकाे विद्यालय प्रशासनले जनाएको छ ।

शुक्रबार पूर्व सांसद सराज अहमद फारुकी, गाउँपालिका अध्यक्ष गोपाल बहादुर थापा, उपाध्यक्ष लक्ष्मी कुमारी चौधरी तथा २ का वडा अध्यक्ष नेपाल चौधरीले संयुक्त रूपमा भवनको शिलान्यास गरेका हुन् ।

शिलान्यास कार्यक्रममा बाेल्दै पूर्व सांसद सराज अहमद फारुकीले शिक्षामा गरिएको लगानी भविष्य निर्माणको आधार भएको उल्लेख गर्दै नयाँ भवनले विद्यालयको शैक्षिक गतिविधिलाई थप प्रभावकारी बनाउने विश्वास व्यक्त गरेका छन् । फारुकीले ग्रामीण क्षेत्रका विद्यालयहरूको भौतिक पूर्वाधार सुदृढ हुनुले शिक्षाको गुणस्तर अभिवृद्धिमा सकारात्मक प्रभाव पर्ने बताए ।

यस्तै गाउँपालिका अध्यक्ष गोपाल बहादुर थापाले गुणस्तरीय शिक्षाका लागि भौतिक पूर्वाधार महत्वपूर्ण आधार भएको बताउँदै विद्यालयको शैक्षिक वातावरण सुधार गर्न गाउँपालिका निरन्तर लागिरहेको बताए । उनले निर्माण कार्यलाई गुणस्तरीय र समयमै सम्पन्न गर्न निर्माण कम्पनीलाई आग्रह समेत गरे ।

यसैगरी गाउँपालिकाकी उपाध्यक्ष लक्ष्मी कुमारी चौधरीले शिक्षामा गरिएको लगानी नै समृद्ध समाज निर्माणको आधार भएको बताइन् । उनले विद्यालयको भौतिक पूर्वाधार सुदृढ भएसँगै विद्यार्थीले थप राम्रो वातावरणमा अध्ययन गर्ने अवसर पाउने जिकिर गरिन् ।

यस्तै प्रधानाध्यापक मिर्जा प्रसाद चाैधरीले नयाँ भवन निर्माणले विद्यालयको शैक्षिक तथा प्रशासनिक गतिविधि सञ्चालनमा ठूलो सहजता ल्याउने बताए । उनले विद्यार्थीलाई सुरक्षित, व्यवस्थित र गुणस्तरीय सिकाई वातावरण प्रदान गर्न भवन महत्वपूर्ण आधार बन्ने विश्वास व्यक्त गर्दै भवन निर्माणका लागि सहयोग गर्ने सबैप्रति धन्यवाद ज्ञापन गरे ।

विद्यालय व्यवस्थापन समितिका अध्यक्ष अमरुध थारुले नयाँ भवन निर्माणपछि विद्यार्थीलाई सहज, सुरक्षित र व्यवस्थित हुने बताउँदै भवन निर्माणलाई विद्यालयको विकासका लागि महत्वपूर्ण उपलब्धीका रूपमा लिएकाे बताए ।

भवन निर्माणको ठेक्का एम/एस भिक्टोरिया हाइड्रो कन्स्ट्रक्सनले पाएकाे छ । निर्माण कम्पनीका ठेकेदार प्रकाश गौतमका अनुसार करिब १ करोड रुपैयाँको लागतमा भवन निर्माण हुन लागेको हो ।

रोचक

सबै

• 

  ” #मेरोभरौल” -कविता

  अशोज ७, २०७७

• 

  गर्लफ्रेन्ड भाडामा पाईने देश

  चैत्र ११, २०७६

थारु भाषाको “दिल जिगर तुहि धडकन” अडियो म्युजिक सार्वजनिक ।।

माघ १४, २०७६

राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…